Berijming Psaume 8 Clément Marot

I
O nostre Dieu, et Seigneur amiable,
Combien ton nom est grand et admirable
Par tout ce val terrestre spacieux,
Qui ta puissance esleue sur les cieux!

II
En tout se void ta grand vertu parfaite,
Iusqu'à la bouche aux enfans qu'on allaite:
Et rends par là confus et abbatu
Tout ennemi qui nie ta vertu.

III
Mais quand ie voy et contemple en courage
Tes cieux qui sont de tes doigts haut courage
Estoilles, lune, et signes differens
Que tu as faits et assis en leurs rengs:

IV
Adonc ie di à par moy, ainsi comme
Tout esbahi, Et qu'est-ce que de l'homme,
D'auoir daigné de luy te souuenir,
Et de vouloir en ton soin le tenir?

V
Tu l'as fait tel que plus il ne lui reste
Fors estre Dieu. Car tu l'as (quant an reste)
Abondamment de gloire enuironné,
Rempli de biens, et d'honneur couronné.

VI
Regner le fais sur les oeuures tant belles
De tes deux mains, comme Seigneur d’icelles:
Tu as de vray, sans quelque exception.
Mis ssous ses pieds tout en suiettion.

VII
Brebis, et boeufs, et leurs peaux, et leurs laines,
Tous les troupeaux des hauts monts et des plaines,
En general toutes bestes cherchans
A pasturer et par bois et par champs.

VIII
Oiseaux de l’air, qui volent et qui chantent,
Poissons de mer, ceux qui nagent et hantent
Par les sentiers de mer grans et petits,
Tu les as tous à l’homme assuiettis.

IX
O nostre Dieu, et Seigneur amiable,
Comme à bon droit est grand et admirable,
L’excellent bruit de ton Nom précieux
Par tout se val terrestre spacieux.

Programmaboekje [PDF]